Nakilala na ang bangkay sang lalaki nga nasapwan sa Bangga Adam, Barangay Pahanocoy, Bacolod City kahapon sang aga, Marso 5.
Ang biktima ang ginkilala lamang nga si Alyas Tonton, 32 anyos, single, wala sang trabaho, kag residente sang Prk Rojas, Brgy Tangub, Bacolod City.
Sa interview sang Bombo Radyo Bacolod kay Police Captain Sherwin Galupar, Officer in Charge sang Bacolod Police Station 10, tatlo sila ka Police Station ang una nga nagresponder sa insidente bangod yara sa boundary sang pila ka Barangay nasapwan ang bangkay, tubtob nga natumod nga ini ang sakop sang Brgy Pahanocoy gani sila ang nag-uyat sa kaso.
Utod sini ang una nga nakig-angot sa kapulisan kag gintumod ang bangkay paagi sa picture, bangod ini ang wala makapauli sang gab-i.
Gilayon man nga ginpadulungan sang ila pamilya ang punerarya agud maseguro.
Sa karun, nag-ayo ang pamilya sa kapulisan nga indi anay maghatag sang pahayag, bangod unahon nila sa pag-asikaso ang bangkay.
Si Tonton ang nasapwan nga nakaboxer shorts lamang, kag may mga lagob partikular na sa batiis.
Suno kay Galupar, ang kapulisan ang magarequest sa pamilya nga mapaidalom sa autopsy examination ang bangkay, agud matumod ang rasun sa kamatayon.
Luyag man nila mahibaluan kun sin-o ang ulihi nga nakita nga kaupod sang biktima, kag kun ini ang may gina-updan nga barkada ukon grupo. Samtang, nagapati ang iloy sang 32 anyos nga lalaki nga nasapwan nga patay sa Bangga Adam, Barangay Pahanocoy, Bacolod City nga gintorture ang iya nga bata antes ginpatay.
Sa interview sang Bombo Radyo Bacolod kay Lanie Borda, residente sang Prk Rojas, Brgy Tangub, Bacolod City, tuman ka sakit para sa iya nga makita ang kahimtangan sang iya bata nga si Wilson Borda alyas Tonton sang ini ang ila ginkadtuan sa punerarya.
Suno sa iloy, may dako nga laslas sa liog ang iya bata, may mga pilas sang gapos sa kamot, mga pilas sa guya kag dughan, kag ginpanitan ang batiis tubtob sa hita.
Mabudlay man para sa amay sini nga stroke victim ang pagbatun sa balita.
Suno kay Lanie, sa ila balay gid nagapamahaw, panyaga kag panyapon ang ila bata, apang nagatulog sa balay sang iya abyan.
Pahayag sini nga sang Miyerkules sang gab-i, nagpanyapon pa sa ila si Wilson kapin alas-6:00 tubtob alas-7:00 sang gab-i.
Ini ang nakaboxer shorts nalang nga suksok sini sang masapwan, bangod suno diri siya ang magapaligo sa iya pagpauli sa ginatulugan nga balay.
Pahayag sang iloy nga may bag-o nga grupo nga gina-updan ang iya bata, kag ini ang indi pa niya mga kilala.
Nagapati ini nga ang barkada amo ang nakahalit sa iya nga bata.
Si Wilson suno diri ang wala sang record nga reklamo sa Barangay kasubong man sa Police Station suno sa iya iloy.
Si Wilson ang nagatrabaho sadto sa delivery sang mga construction supplies, apang ini sa karun ang wala sang trabaho, kag plano pa lamang nga mang-apply.
Suno sa iloy, si Wilson ang wala pa sang kaugalingon nga pamilya apang may duha ka bata nga lalaki sa una nga kahagugma, kag isa ka bata nga lalaki sa ikaduha sini nga kahagugma.
Nagalaom ang iloy nga matumod ang may kahimuan sa krimen, kag siya ang desidido nga magpasaka sang kaso.
