Ang mga kapulisan ang gintrain para maglagas sa mga kriminal.
Apang pinasahi ang natabo sa Estados Unidos matapos nga ang mga kapulisan ang ginpalagas sang mga baboy kag manok.
Na-eksperyensyahan sang mga kapulisan sa Kent, Washington ang ‘catch me if you can.’
Ini matapos makapalagyo ang madamo nga mga kasapatan gikan sa isa ka farm kag nagpinalagyo padulong sa kalsada.
Suno sa Kent Police Department, nakabaton sila sang tawag sa 911 nahanungod sa mga kasapatan nga nagahatag obstruction sa dalan.
Pag-abot sang mga pulis ila naabtan ang mga baboy kag manok nga nagalagsanay sa kalsada.
Gintinguhaan sa mga otoridad nga madakpon kag matipon ang mga kasapatan apang sila ang nakaangkon sang kabudlayan bangud indi magpadakop ang mga manok kag indi man madali nga makit-an ang mga baboy.
Sa ulihi, nahimo man nga matipon ang mga kasapatan kag nabalik sa farm.
