Ginalauman na sang political analyst nga madismiss ang impeachment complaint batok kay President Ferdinand “Bongbong” Marcos agud mahatagan sang ligwa nga mapasaka ang ifile nga impeachment complaint batok kay Vice President Sara Duterte.
Sa interview sang Bombo Radyo Bacolod kay Atty Jomax Ortiz, ginalauman na nga sumugod sa Pebrero 6, magapinalumba-anay naman sang file sang impeachment complaint batok sa Bise Presidente.
Ginalantaw ni Ortiz nga hingagawon nga mapasaka sa House Committee on Justice ang complaint batok kay Marcos.
Ini ang ginalauman naman nga madismiss bangod sa hapaw nga ebidensya ukon kun indi makitaan sang probable cause nga ipasaka sa Senado.
Apisar idismiss sang Committee on Justice, ang desisyon ang botohan gihapon sang tanan nga mga Kongresista kun paboran ang dismissal ukon irekomendar ang refiling.
Apang makita na suno kay Ortiz nga mayorya sa mga Kongresista ang nagalinyada sa Marcos Administration.
Paathag sini nga indi kaangay sa impeachment case nga kinahanglan sang one-third vote, sa pagdesisyon sa dismissal, kinahanglan lamang sang majority vote.
Kun mafile ang impeachment complaint kay VP Sara kag malab-utan ang kay Marcos sa Committee on Justice, unahon gihapon ang pagresolbar sang impeachment complaint sa Presidente.
Samtang kun madismiss na, sarang na nga mapasaka sa Senado para sa impeachment trial ang kay VP Sara.
Para kay Ortiz, balik-awot kung duha ka impeachment complaint ang dungan nga atubangon sang Senate Impeachment Court.
