Ginpaathag sang parish priest sang Our Lady of Candles Parish kun ano ang importansya sang kwaresma, partikular na ang ginaobserbar sa karun nga Ash Wednesday.
Suno kay Monsignor Felix Pasquin, ang Ash Wednesday amo ang una nga adlaw sang tion sang Kwaresma kun sa diin nagabutang sang abo sa mga agtang sa porma nga cross.
Suno sa pari, ini ang nagakahulugan sang duha ka butang.
Kalakip diri ang paghinulsol sa sala kasubong man ang pagpahanumdom sa mortality ukon kamatayon.
Suno kay Monsignor Pasquin, bangod sa sala sang tawo, ang Diyos ang nagpahayag nga ang tawo ang gikan sa yab-ok kag ang mga ini ang magapauli man sa yab-ok.
Pahayag sang pari nga espesyal na panahon sa leturhiya sang simbahang katoliko ang pagsugod sang kwaresma kag ini man ang tion agud mapanumdom sang tagsa ka persona ang ila nangin pagpangabuhi, estado sang ila kalag ukon ang relasyon sa Diyos kasubong man sa isig kapareho.
Paathag ni Monsignor Pasquin nga bangod ang tawo nakasala, sa panahon sang kwaresma ginapahanumdom sa tawo nga maghinulsol.
Suno sa pari ang lent ukon kwarisma ang nagikan sa tinaga nga 40, gani ang lenten season ang nagakahulugan sang 40 ka adlaw, apang suno sa pari mahimo man ini nga malip-ot ukon masobra sa 40 dias.
Ini ang period of reparation kaangay sa anaw sadto nga nagdugay sang 40 ka adlaw kag 40 ka gab-i kun sa diin sang matapos nagtuhaw man ang panibag-o kag mas maayo nga pagkatawo gikan sa anay makasasala nga kalibutan.
Kaangay man ini sa banwa sang Israel sang ginkuha gikan sa ehipto agud dal-on sa Promised Land kun sa diin naglakat man ang mga ini sa sulod sang 40 ka tuig.
Samtang sa Neneve naman kun sa diin makasasala ang mga tawo, ginpadal-an ang mga ini sang propeta nga nagtandog sang tagipusuon sang mga pumuluyo nga nagresulta agud nga ang mga ini ang magpu-asa sa sulod sang 40 ka adlaw agud nga mapasaylo sang Diyos.
Dugang pa ni Monsignor Pasquin nga si Hesus, antes magsugod sa public ministry ang nagpadulong man sa desyerto kag nagpangamuyo sa sulod sang 40 ka adlaw kag 40 ka gab-i kadungan sa pagpu-asa ukon fasting bilang preparasyon sa iya nga public ministry kag pascual mystery. Samtang, kadungan sang lenten season ukon kwaresma, ginapahanumdom sang parish priest sa Our Lady of Candles Parish nga indi dapat pagkalipatan nga may-ara kita sang kalag.
Suno kay Monsignor Felix Pasquin, kun ang tawo mapatay ang kalag ang nagabalik sa Ginoo.
Gani panugyan sini nga dapat halungan ang kalag kun sa diin dapat nga mangin mahinalungon sa ginahimo sa kabuhi.
Pahanumdom sang pari nga sa kwaresma may disiplina ang mga katoliko nga pagpatigayon sang fasting kag abstenence.
Ang fasting amo ang pagbuhin sa pagkaon ukon indi mismo pagkaon samtang ang abstenence naman amo ang paglikaw sa mga bagay nga maayo nga butang kaangay sa pagkaon sang karne.
Suno kay Monsignor Pasquin, ini ang nagakahulugan nga pagdisiplina sang tagsa ka kaugalingon.
Paathag sang pari nga bilang tawo, may-ara kita sang tendency nga mag-abuso ukon sala ang pagdala sang atun nga kabuhi tubtob sa maguba natun ang atun pagkatawo gani pinaagi sa fasting makatuon kita nga madisiplina ang kaugalingon.
Paathag ni Monsignor Pasquin nga ang kagutom ang may espiritwal nga kahulugan kag ini ang kagutom sa presensya sang Ginoo.
Ang Fasting ang ginapanugyan sa tanan nga mga katoliko nga edad 18 tubtob 60 anyos, samtang abstinence naman para sa 14 anyos pasaka.
Pahanumdom sang pari nga sa bilog nga tuig sang church calendar, duha lang ka beses ini nga ginapatigayon kag amo sa Ash Wednesday kasubong man sa Good Friday.
Paathag man sini nga wala natapos sa pagkaon ang abstinence bangod mahimo man ini pinaagi sa paglimita sa kaugalingon sa mga teknolohiya ukon gadgets nga amo ang pinakamasami nga ginatandog.
Suno kay Monsignor Pasquin, ang misa sa Our Lady of Candles Parish sa Barangay Villamonte, Bacolod City ang patigayunon alas-6:00 subong nga aga kag alas-6:00 karun sa hapon.
Pasalig man sini nga tanan nga simbahan sang katoliko ang may schedule sang misa gani tanan ang mahatagan sang oportunidad nga magpabadless.
Pangabay sang pari sa mga tumuluo nga iobserbar ang pagsuksok sang facemask, social distancing, temperature checking sa pagsulod sa simbahan kag mas maayo kun may dala nga alcohol ang kada isa.
