Ginpanindugan sang National Federation of Sugar Workers nga wala sang oversupply sang kalamay sa Pilipinas, kag ang oversupply ang gintuga sang sugar importation.
Sa press conference nga ginpatigayon kaina, ginpahayag ni Johnny Lava nga tuman nagid ka pierde ang mga sugar farmers bangod sa tuman ka barato nga millgate price sang kalamay.
Suno diri, pagdangat sa sugar central, ginatunga pa ini sa 70/30, gani 70 percent na lamang sang benta ang ila nga mabatun.
Pahayag sini nga sila ang tuman ka pierde bangod dako ang gastos sa tawo sa land preparation kag abono.
Suno diri, kun magapadayun ang kaangay nga presyo kag indi masolusyunan, sila ang mapilitan nga magtanom sang iban nga produkto.
Aminado ini nga mabudlayan sila sa pagpangita sang bag-o nga market kun maglain sang itanom, apang ini ang ila na lamang risguhan sangsa magpadayun sa pagtanom sang tubo nga maniyerdihan lamang.
Samtang madulaan naman sang trabaho ang mga sugar workers kun sila ang magsaylo sa high value crops.
Suno kay Lava, sila ang nakapadala na sang position paper sa Sugar Regulatory Administration, apang wala man ginsapak ang ila nga concern.
Nagprotesta man sila sa gwa sang SRA building, apang sila ang ginpatawgan pa sang pulis.
Panindugan sang mga ini nga husto lamang ang local sugar supply sa Pilipinas.
Apang ang nagatuga sang oversupply amo ang mga nagasulod nga imported nga kalamay, gani nagasarurot man panaog ang millgate prices.
