Nahuman na sa shipyard sa Finland ang barko nga ginakabig world’s biggest cruise ship, kag ini ang yara na sa kadagatan para sa sea trials antes ang delivery sa Oktobre subong nga tuig.
Ang “Icon of the Seas” sang Royal Caribbean International ang may kalabaon nga 365 metros kag nagabug-at sang 250,800 ka tonelada.
Sa paglayag sini sa Caribbean sea sa maabot nga Enero 2024, ini ang sarang nga masakyan sang 5,610 ka pasahero kag 2,350 ka mga crew.
Ang barko ang magaserbe man nga “world’s largest waterpark” sa kadagatan.
Ang waterpark nga ginpangalanan “Category 6” ang magafeature sang anom ka record-breaking nga mga water slides, samtang ang mga guests nga luyag lamang magpahunay-hunay ang sarang naman nga makatambay sa pito ka mga pools kag siyam ka whirlpools nga yara sa barko.
Ini ang ginhuman sa Meyer Turku shipyard, isa sa nagapanguna nga shipbuilders sa Europe nga nahamtang sa Turku, Finland.
Ang barko ang may-ara man sang masobra 40 ka mga kalan-an, ilimnan kag enternainment areas, kag kadam-an sa mga ini ang kabahin na sa pamasahe sa pagsakay sa cruise ship.
Ang Icon of the Seas ang may-ara man sang 20 ka decks kag nanarisari nga lugar nga mahimo ma-explore, nga nagafeature sang nanarisari nga vacationer, kaangay sang isa ka pamilya tubtob sa adults-only places kaangay sa first dueling pianos bar sang Royal Caribbean International.
May-ara man sang 28 ka nanarisari nga accomodations ukon kwarto, kag kadam-an sa mga ini ang para sa pamilya, samtang may mga layout man nga may ocean views ukon mas malapad para sa mas dako nga grupo sang travelers.
Ang Icon of the Seas ang labing una nga barko sang Royal Caribbean International nga ginapadalagan sang liquefied natural gas (LNG) kag fuel cell technology, bilang kabahin sa tikang sang kompanya sa pagsaylo sa clean-energy.
