BACOLOD CITY — Nagpanawagan ang isa ka opisyal sang militar sa mga pamatan-on nga indi pagbuy-an ang handom bisan naga-antos sa kapigaduhon.
Sa Good Morning Philippines, ginpaambit ni Lieutenant Col. Elmer Suderio, executive assistant sang commanding general sang Philippine Army nga si Major General Rolando Joselito Bautista, kun ano ang iya mga inagyan antes nangin opisyal sang militar.
Si Suderio ang ginbun-ag sa Santa Barbara, Iloilo apang taga-Dumaguete City ang iya iloy.
Suno diri, si General Martin Delgado ang iya inspirasyon sadto sa paghandom nga mangin suldado.
Apang labaw sa tanan, kapigaduhon ang nagtulod sa iya nga magsulod sa Philippine Military Academy kun sa diin libre ang edukasyon.
Gamay pa nailo si Suderio sa amay rason nga nagtindog bilang iloy kag amay ang iya iloy kag napilitan sila nga magsaylo sa Dumaguete City.
Nag-working student ang suldado sang high school antes nagpadulong sa Metro Manila.
Diri, nag-enroll siya sa kurso nga BS Electrical Engineering apang wala siya nakatapos bangud indi makasarang sang gasto.
Napilitan si Suderio nga magkuha sang entrance examination sa PMA kag siya ang nakapasar.
Nagtapos ini bilang salutatorian sang PMA Maalab Class of 1993.
Suno kay Suderio, ginbatas niya ang kabudlay sang training sa PMA bangud indi siya luyag nga magbalik sa pagpanggarab kag mangin imol.
Sang nakagraduate na, ginpili sini nga mangin kabahin sang Philippine Army.
Sa pagligad sang panahon, si Suderio ang ginabansagan sa karon bilang Basilan soldier-trailblazer.
Siya man ang nagserbe nga operations officer sang Joint Task Force Marawi sa nagluntad nga Marawi siege.
Subong nga tuig, si Suderio ang ginkilala bilang isa sa mga Outstanding Filipinos kag ginpasidunggan man sang Santa Barbara.
