BACOLOD CITY — Wala naglaom ang ginbansagan nga Basilan soldier-trailblazer nga mapatay nila ang lider sang Abu Sayyaf Group nga si Isnilon Hapilon makaligad ang halos 20 ka tuig humalin sang una niya ini nga naengkwentro sa Basilan.
Madumduman nga si Hapilon ang nagpasimuno sang Marawi siege kag napatay ini sang mga suldado sang nagligad nga bulan.
Si Lieutenant Col. Elmer Suderio sang Santa Barbara, Iloilo amo ang nagserbe nga assistant chief of staff for operations sang 1st Infantry Division sa Camp Ranao, Marawi City.
Siya man ang nagserbe nga operations officer sang Joint Task Force Marawi humalin sang bulan sang Mayo tubtub nga natapos ang giyera.
Sang Mayo 23 suno kay Suderio, na-frustrate ang mga suldado bangud nakahimo sang buho sa pader sanday Hapilon rason nga nakapalagyo sila sa raid kag nakasaylo sa city proper.
Nagsala lamang ang mga terorista bangud wala sila naglaom nga sundon sang gobyerno kag diri nakita ni Suderio kun ano kaisog ang mga suldado.
Nagdugay ang operasyon bangud 12 mil ka mga building ang kinahanglan nga iclear kag ginagamit pa sang kontra ang mga moske nga indi pwede bombahan sang gobyerno.
Sang ulihi, nangin suicidal ang mga terorista rason nga madamo ang nagkalamatay nga suldado.
Sang natiruhan sang sniper sanday Hapilon kag Omar Maute, victory ang nabatyagan ni Suderio sang una sini nga nakit-an ang litrato.
Suno diri, wala siya naglaom nga makaligad ang 19 ka tuig, sa Marawi nila malagas kag mapatay ang lider sang Abu Sayyaf.
