Boluntaryo nga nagsungka, kag gilayon man nga nakapyansa ang Indian National nga responsable sa pag-arado sang mga nagaprosisyon sa Barangay Alangilan sang Abril 18, Biyernes Santo, kun sa diin tatlo ang ginbawian sang kabuhi matapos maggwa ang warrant of arrest kahapon.
Sa press conference ni Bacolod City Police Office Director Police Col Joeresty Coronica, masobra 15 ang mga nagfile sang kaso batok kay Jagpret Singh, 37 anyos, residente sang B133, Lot.89, Buena Park Subd., Brgy. Villamonte, Bacolod City.
Si Singh ang bpluntaryo nga nagsungka kapin alas-9:37 kahapon sang aga.
Ginalantaw nga natimbrehan na sini ang paggwa sang warrant kasubong man kun pila ang bail bond.
Ini bangod gilayon man nga nakapyansa ang suspect sa balor nga P500,000.
Madumduman nga ginpasakaan sang kaso nga reckless imprudence resulting to multiple homicide ang suspect, sa pagkapatay sang tatlo ka biktima, kag reckless imprudence resulting to multiple physical injuries para sa iban pa nga nagkalasamaran.
Nagapati si Coronica nga wala sang settlement sa tunga sang Indian national kag mga biktima, bangod nagdangat pa sa masobra 15 ang nagpasaka sang kaso.
Wala naman nadala sa kaso ang pagbayolar sang anti-drunk driving law, matapos nga wala ginbatun sang korte apisar nga ini ang nagpositibo sa liqour test.
Apisar nga temporaryo nga nahilway, si Singh ang required man nga magtambong sa mga patigayunon nga trial.
