Aminado ang isa sa mga informal settlers sa syudad sang Bacolod nga mapasugot man sila nga magsaylo sa balay nga ipatindog sang syudad kun masarangan sang mga ini ang balayran kag malapit ang lugar sa ila palangabuhian.
Sa interview sang Bombo Radyo Bacolod kay Myrna Equito, 35 anyos na nga nagapuyo sa Purok Seaside sa Barangay Banago, syudad sang Bacolod, wala sang tag-iya ang ginatindugan sang ila balay kag nakatuntong sa pika-pika nga ginhimo sang syudad.
Suno kay Equito, 800 ka mga residente sa ila lugar ang nagasalig lamang sa dagat agud mabuhi gani mabudlayan ang mga ini kun irelocate sila sa malayo sa dagat kaangay sang Vista Alegre.
Samtang, kun malakip man sila sa igarelocate sa balay nga patindugon sang syudad mapasugot man sila nga magsaylo kun masarangan sang mga ini ang bayad sa balay.
