Nagadangat sa P100,000 ang halit sang sunog sa engineering building sang STI-West Negros University sa Burgos St. ciudad sang Bacolod kahapon sang hapon.
Suno kay City Fire Marshall, Fire Chief Inspector Publio Ploteña, alas-5:31 kahapon sang hapon sang ila nabaton ang fire call.
Suno kay Ploteña, napulo ka wala na ginagamit nga hulot sang engineering building ang nasunog.
Ini ang rason suno kay Ploteña kun ngaa wala man sang mga estudyante kag manunudlo nga napilasan ukon napatay.
Alas-6:27 naman sang gab-i sang gindeklarar ini nga fireout.
Subong nga aga, magabalik ang Bureau of Fire Protection (BFP) sa lugar agud nga magpatigayon sang dugang pa nga imbestigasyon.
Samtang suno diri, ang tuman ka damol nga aso nga makita sa mga videos kag litrato sang sunog kahapon, ang tuga lamang sang mga nasunog nga papel sa building.
Samtang ginkumpirmar sang City Fire Marshall nga may isa man ka balay nga ginlamon sang kalayo sa Wood Side 1, Brgy. Mansilingan.
