Patay ang isa ka negosyante matapos ginpaarakan sang luthang pasado alas-4:00 kaina sang aga sa atubang lamang sang Barangay Hall sa Sofia Gonzaga Street, Barangay Estefania, Bacolod City.
Ang biktima ang ginkilala nga si Elson Casalan Cepeda, 49 anyos, residente sa East Homes 2, sa nasambitan nga Barangay.
Sa imbestigasyon, ang biktima ang nagpark sang iya Mitsubishi Montero nga salakyan sa kilid sang dalan agud magbakal sa isa ka convenience store, apang sa pagbalik sini sa iya salakyan siya ang hinali nga ginpaarakan sang luthang sang duha ka wala makilal-an nga persona.
Sa interview sang Bombo Radyo Bacolod kay Police Capt. Francis Depasucat, station commander sa Bacolod Police Station 4, ang biktima ang nagapanag-iya sang bar malapit sa Bacolod City Government Center kag ini ang bangka man sa Small Town Lottery (STL) operation sa ciudad.
Nahibaluan nga ini ang papauli na gikan sa bar upod sa iya asawa kag temporaryo nga naghapit sa convenience store.
Apang sa pagbalik sa salakyan, didto na ini ginluthang sang duha ka persona nga sakay sa isa pa ka salakyan.
Gamit sang mga ini ang long kag short firearms nga wala pa matumod, samtang ginahulat pa sang kapulisan ang medical record sang biktima kag imbestigasyon sang Scene of the Crime Operation (SOCO)
Nagapati si Depasucat nga si Cepeda gid ang target bangod wala man gintandog ang iya asawa.
Gindala pa sa Riverside Medical Hospital ang biktima, apang ini ang gindeklarar nga dead on arrival.
Gina-imbestigaran pa sa karun kun may pagpamahog na nga nabatun ang biktima.
Samtang ginalantaw man ang posibilidad sang kaangtanan sa iya trabaho kasubong man bilang bangka sa STL operation bilang motibo sa krimen.
