Patay ang isa ka katapo sang New People’s Army (NPA) kasunod sang engkwentro batok sa militar kahapon Oktobre 29 sa syudad sang Guihulngan, Negros Oriental.
Santo sa statement nga ginpagwa sang 62nd Infantry “Unifier” Battalion sang Philippine Army, nagluntad ang engkwentro matapos nga sila ang ginpahibalo sang mga naga-evacuate nga pumuluyo bangod sa halit sang Tropical Storm PAENG, kun sa diin ila nakasumpong ang kapin 20 ka mga katapo sang Communist NPA Terrorists (CNT) sang Central Negros 1 sa Sitio Mambog, Barangay Planas, Guihulngan City, Negros Oriental.
Nahibaluan nga samtang yara sa standby alert sa pagpatigayon sang humanitarian assistance kag disaster response operations agud maseguro ang kahilwayan sang mga residente sa syudad sang Guihulngan bangod sa bagyo, isa ka pumuluyo ang nagpahibalo nga may nagaluntad nga extortion activities sa Barangay Planas nga gilayon naman nga ginrespondehan sang 62nd IB.
Samtang nagahilapit ang tropa sa nasambit nga lokasyon, sila ang una nga ginpalukpan sang makawala nga grupo nga nagresulta sa 30 minutos nga pagbayluhan sang lupok.
Kasunod sini, nagpalagyo sa nabagatnan nga dereksyon ang mga NPA.
Sa kaangay nga adlaw, samtang nagapatigayon sang pursuit operations, may isa pa ka engkwentro ang nagluntad batok sa mga nagpinalagyo nga CNT members sa Sitio Ilihan, Barangay Buenavista, Guihulngan City, Negros Oriental.Ang pagbayluhanay sang lupok ang naglawig sang lima lamang ka minutos kun sa diin nagpalagyo ang mga rebelde sa naaminhan nga dereksyon.
Wala sang casualties sa bahin sang gobyerno sa duha ka engkwentro samtang sa bahin sang NPA, nakarecover ang mga ini sang isa ka bangkay nga sa karun wala pa matumod ang identity.
Narecover man sa encounter site ang isa ka 12 guage shotgun; isa ka .45 caliber pistol; isa ka hand grenade; duha ka Baofeng Radios; duha ka backpacks nga naga-unod sang personal nga pagkabutang; kag pila ka mga subersibo nga dokumento sang Communist NPA Terrorists.
Ginalantaw nga mahimo may dugang pa nga napatay sa makawala nga grupo santo sa nakita nga heavy blood stains sa encounter site.
Ginapasalig sang pamunuan sang 62nd IB ang suporta kag pagbulig sa local government unit (LGU) sang Guihulngan City agud maseguro ang mga pumuluyo sa tion sang mga kalamidad.
Liwat man nga ginapanawagan sang militar sa mga NPA members partikular na ang mga nasamaran nga magsungka na kag buy-an ang ila nga mga armas kag magbalik sa sabak sang gobyerno agud mahatagan sang nagakaigo nga pagbulong kag makabaton sang enhanced comprehensive local integration program (ECLIP) benefits kag iban pa nga sustainment livelihood programs gikan sa Guihulngan City Task Force to End Local Communist Armed Conflict.
