Masobra pa sa grasya kag ginakabig na nga perwisyo sang gobyerno sang Thailand ang gilayon nga pagdamo sang isa ka sahi sang tilapia sa ila mga suba.
Agud nga maganyat ang mga tawo nga maghulik sang mga isda, ginabakal nila ini sa balor nga 15 baht ukon kapareho sang P24 ang kada kilo.
Sa isa ka report, ginpakita ang video nga malapit na nga mapuno sang tuman kadamo nga blackchin tilapia ang isa ka suba sa Bangkok.
Magluwas diri, nagbuya naman ang gobyerno sang Thailand sang mga predator fish kaangay sang Barramundi agud nga magkaon sa nasambit nga tilapia.
Magluwas sa Thailand, may iban pa nga lugar sa Asya ang gulpyada lamang nga ginbaha sang blackchin tilapia kag isa na diri ang Taiwan.
Ginaimbestigaran pa sang mga otoridad ang kabangdanan sa gulpi nga pagdamo sini.
Nagapanghulik man ang mga residente agud nga sud-anon apang apisar nga adlaw adlaw sila nagapanghulik, wala nagakaubos ang tilapia.
