Patay ang tricycle driver samtang pilason naman ang apat sini ka pasahero matapos nga mabungguan sang sugata nga canter truck sa Access Road, Barangay Tinampaan, Cadiz City, Negros Occidental kahapon sang hapon.
Suno kay P/Lt Gina Fernandez, deputy chief for administration sang Cadiz City Police Station, ang mga salakyan nga imbulbado ang ginalakipan sang tricycle, isa ka Isuzu multicab kag Isuzu Canter Truck.
Ang driver sang tricycle nga ginbawian sang kabuhi ang ginkilala kay Rodrigo Magbanua, 53 anyos residente sa Eusebio Subdivision, Zone 2, Cadiz City, samtang wala naman ginhingadlan ang apat ka mga pasahero sini nga padayun pa nga ginabulong.
Samtang ang driver sang canter truck ang ginkilala naman kay Julieto Jaranilla, 59 anyos residente sa Hacienda Reboton, Cadiz City.
Santo sa imbestigasyon, nagasunod ang tricycle sa multicab kun sa diin naghinay sang pagpadalagan ang multicab gani nagbunggo sa likod sini ang tricycle.
Bangod sini, nadulaan sang kontrol si Magbanua gani nagbalang-balang ang tricycle tubtob sa magtabok sa pihak nga lane.
Apang ini ang hinali naman nga nabungguan sang sugata nga canter truck nga naga-unod sang mga isda kag ginamaneho ni Jaranilla.
Ginhingagaw pa dala sa Cadiz City Emergency Clinic ang driver sang tricycle kag mga pasahero sini, apang si Magbanua ang gindeklarar nga dead on arrival.
Si Jaranilla ang yara naman sa karun sa kustodiya sang Cadiz City Police Station, samtang ginahulat naman ang pamilya sang mga biktima kun ang mga ini ang magapasaka sang kaso.
