Siyam ka mga manugpangisda ang nadakpan sa Seaborne Operation nga ginpatigayon sang Sagay City Police Station sa Panalsagon Area, State Marine Reserve, Sagay City.
Sa interview sang Bombo Radyo kay Police Major Antonio Benitez, hepe sang Sagay City PNP, ang mga suspetsado ang ginkilala kanday Diolito Amaro; Yan Mark Boc; James Arisgado; Lyndon Boc; Doroteo Respunde; Arsenio Sagal; Mark Eras; Roselo Dy; kag Joel Amaro kag mga residente sang Sitio Palanas, Brgy. Old Poblacion, Escalante City.
Suno kay Benitez, nadakpan nga nagapangisda ang mga ini sa protected area sang Sagay kun sa diin nagapangitlog kag nagapadamo ang mga isda.
Aminado ang hepe nga nagakasubo man ini kun may madakpan nga mga manugpangisda bangud naintindihan man sini ang ila nga pangabuhian apang nagalaom ini nga maintindihan man nga ginaprotektahan lang nila ang marine sanctuary.
Suno sa iya, kinahanglan nga magbayad sang administrative fine ang mga suspetsado kag hatagan sila sang warning nga indi na liwat magsulod sa protected area.
Nakuha sa ila paghinakop ang isa ka unit sang pumpboat honda engine, isa ka set sang fishing net, isa ka goggle, 15 ka panyapak kag isa ka lukos.
Sa karun, yara sa kustodiya sang Sagay City Police Station ang mga suspetsado.
