Isa patay, isa pilason matapos ginluthang sa Sitio Peson, Brgy. Minautok, Calatrava, Negros Occidental alas-7:45 kagab-i.
Ang mga suspect ang gina-alegar apat ka armado nga persona.
Ang napatay ang ginkilala nga si Alyas Mario, residente sa lugar; samtang pilason naman si Alyas Odel, 22 anyos, matapos masalabat sang bala.
Sa inisyal nga imbestigasyon sang Calatrava Municipal Police Station, pwersahan nga ginsulod sang 4 ka armado ang balay ni Mario.
Siya ang gilayon nga ginluthang sang makapila ka beses sang isa sa mga suspect, samtang ang nabilin ang nagserbe naman nga lookout.
Ang biktima ang nag-agom sang igo sang bala sa ulo kag pila ka bahin sang lawas, nga nagresulta sa iya gilayon nga kamatayon.
Samtang nasalabat naman sang bala sa iya natuo nga tudlo sa tiil si Odel, kag ini ang yara na sa estable nga kondisyon.
Sa karun, padayun pa ang imbestigasyon sang Calatrava Municipal Police Station sa kaso, kag padayun man nga ginatumod ang motibo sa krimen.
