Nakilal-an na ang isa sa mga suspect sa pagluthang patay sa American National kag sang iya asawa nga pinay sa sulod sang ila balay sa Brgy. Bajumpandan, Dumaguete City, Negros Oriental.
Madumduman nga nasapwan nga wala na sang kabuhi kag may igo sang bala sa sulod sang ila balay ang mag-asawa nga sanday Mark Duell, 72 anyos kag Elsa Duell, 71 anyos sang Setyembre 2.
Gilayon naman nga nagtukod sang Special Investigation Task Group ang Negros Oriental Police Provincial Office kasunod sa insidente.
Sa interview sang Bombo Radyo kay Police Captain Stephen Jaynard Polinar, Spokesperson sang NORPPO, isa sa mga suspect ang nakilal-an na kag ginaproseso na nila subong ang kaso nga ifile batok diri.
Ginalauman sini nga maggwa na ang arrest warrant subong nga semana.
Sa pihak sini, suno kay Polinar, indi pa sila makahatag sang dugang nga detalye angot sa identified suspect samtang nagapabilin pa ini nga at large.
Pahayag ni Poliar nga nagapakigkoordinar naman ang pamilya sang American National sa mga kapulisan.
Padayon ang ila imbestigasyon sa pagdakop sang mga suspetsado.
