Nagtukod ang Police Regional Office Negros Island Region (PRO NIR) sang Special Investigation Task Group (SITG) para sa imbestigasyon sa pagpangluthang sa incumbent Punong Barangay sang Barangay Kansumandig, La Libertad, Negros Oriental, kaagahon sang Setyembre 23.
Sa interview sang Bombo Radyo Bacolod kay Police Captain Stephen Jaynard Polinar, Spokesperson sang Negros Oriental Police Provincial Office, may gindihon na nga SITG agud nga maidid nga maimbestigaran ang natabo nga pagpatay kay Punong Barangay Dennis Oliveros Jimpayan.
Suno kay Polinar limitado pa ang impormasyon nga may yara ini may kaangtanan sa nagluntad nga insidente.
Nahibaluan nga sa inisyal nga imbestigasyon, pasado alas-5:20 sang aga, nagapauli ang biktima halin sa Barangay Pacuan kag nagamaneho sang iya motorsiklo.
Pag-abot sa Sitio Mabilog, nakabati ang mga residente sang sunod-sunod nga lupok sang armas.
Wala magdugay, nakita ang biktima nga nagahamyangon sa kilid sang dalan.
Personal nga nagpadulong sa lugar si PRO NIR Regional Director PBGEN Rudecindo L. Reales agud pangunahan ang police response kag imbestigasyon.
Sa crime scene, narekober ang tatlo ka empty .45-caliber shells, apat ka slugs, kag isa ka cellphone nga gin-seguro bilang ebidensya.
Nagakoordinar man ang kapulisan sa SOCO team kag ginapangita ang mga testigo kag posible nga CCTV footage nga makabulig sa imbestigasyon.
Sa subong, wala pa matumod ang suspek ukon ang motibo sa pagpangluthang.
