Nagakoordinar na ang La Castellana Municipal Police Station sa mga police units sa National Capital Region (NCR) agud nga magturn-over ang isa sa mga suspek sa pagpatay sa mag-asawa sa banwa sang La Castellana.
Ang nasambit nga suspetsado ang ginserbehan sang warrant of arrest matapos nga nagsungka kay Senator Raffy Tulfo.
Sa interview sang Bombo Radyo Bacolod kay Police Captain Jose Michael Muñez – Deputy Chief of Police sang La Castellana Municipal Police Station, ang suspek ang yara pa sa police unit nga nagdakop diri kag nagacoordinate pa sila didto para sa turn-over.
Suno kay Muñez ang bata nga nakasurvive ang nagtumod sa mga suspek, kun sa diin ang duha ang una na nga nadakpan, ang isa ang nagsungka, kag may John Doe pa nga ginapangita.
Madumduman nga napatay ang mag-asawa nga sanday Diomedes Maribong, 50 anyos, kag Vivencia Maribong, 56 anyos samtang nakaluwas naman ang 18 anyos nila nga bata nga babayi.
Ang tatlo ang ginlambatan, ginluthang kag ginlabo sang apat ka suspect.
Ang duha nga una nga nadakpan ang nakahunong sa Bureau of Jail Management and Penology (BJMP).
