P150 nalang ang napauli nga income sang isa ka jeepney driver sa ciudad sang Bacolod kasunod sa nagapadayon nga pagsaka sang produktong petrolyo.
Sa interview sang Bombo Radyo kay alyas Jojie, jeepney driver, plano nalang sini nga magbalik sa pagka-delivery driver kag indi na magbiyahe pa kun maglab-ot na sa P100 ang presyo sang diesel.
Suno kay alyas Jojie, may pila man ka mga kilala niya nga nagaplano nga mag-utat sa pagbyahe kag mangita nalang sang iban nga trabaho bangud suno diri, perdido gid sila sa tuman nga pagsaka sang presyo sang diesel.
Suno diri, kun tubtob P70 lang presyo sang diesel makaya pa sini apang kun maglab-ot na sa P100 mabudlayan na gid sila bangud wala na sila sang ginansya pa.
Panawagan sini nga maski indi nalang magsaka ang plete sang mga pasahero kundi panubuan nalang nag presyo sang produktong petrolyo. Samtang, wala na sang may mahimo pa ang mga jeepney drivers kundi magpadayon sa byahe bisan pa nga dako ang saka sa presyo sang produktong petrolyo.
Sa interview sang Bombo Radyo kay Joel Esmolo, naghingagaw ini patughong kahapon sa balor nga P1,000 nga paigo-on sini nga makalab-ot sa walo ka trip.
Suno diri, indi na sini masarangan pa magpatughong sang full tank kag nakahibalo ini nga wala siya sang mahimo kundi magpadayon na lamang sa pagpangabuhi.
Suno pa kay Esmolo, ang P1.00 nga saka sa plete, awayan pa nila sang pasahero bangod bisan nga P12.00 na kun tani ang minimum sadto may iban sa gihapon nga nagaplete sang P10.00.
Pahayag sini, batonon na lang niya nga nagmahal na ang presyo sang produktong petrolyo bangod wala naman siya sang mahimo samtang bangod nagapa-ekswela pa ini sa iya apo.
