Ginpasalamatan sang operator kag mga driver ang duha ka semana nga pagpahanugot sa ila nga magbiyahe liwat santo sa nadesisyunan sang syudad sang Bacolod kag iban nga mga stakeholders kag wala sang magdakop sa ila apisar nga kulang ang mga ini sa papeles.
Sa interview sang Bombo Radyo Bacolod kay Lilian Cabansag, presidente sang Estefania Drivers Operators Association kag board member sang SSTONE, isa ka kadalag-an ang ginhatag sa ila nga duha ka semana nga makabyahe.
Ginpasalamatan man ni Cabansag, ang syudad, ang Land Transportation Franchising and Regulatory Board (LTRFB) kag Land Transportation Office sa paghatag sa ila sang kahigayunan nga makabiyahe.
Nagapati man ini nga sa sulod sang 15 ka adlaw may yara sang dako nga kaayuhan kag nakita man nga bukas man ang gobyerno nga magpamati sa ila nga luyag ipadangat.
Indi man ini kumporme sa pagsulod pribado nga korporasyon sabaylo luyag sini kuntani nga ang syudad na ang mahimo sang korporasyon agud may yara sang regulasyon.
Wala man ang mga ini sang poblema sa modernisasyon, ang problema lamang sang mga ini ang kamahalon.
Suno kay Cabansag mas makaminus sila sang gastos kun pahanugutan sila sa pagrehabilitate sang ila mga jeep santo sa requirement sang modernization program.
Natalana naman nga sapulon pa sang mga lideres sang jeepney association ang ila mga drivers kag miyembro para sa ila desisyon sa pagsilod sa mga korporasyon.
Samtang, suno naman sa driver nga si Rolly Libre nga nagabiyahe sang Bata-Libertad, ginapasalamatan sang mga ini ang 15 ka adlaw nga makabiyahe sila bangud dako na ini nga bulig para makasupot sila para sa ila pamilya.
