BACOLOD CITY — Padayon sa gihapon ang pag-imbentaryo sang Provincial Accounting Office sang Negros Occidental sa mga job order casuals nga nagahatag sang serbisyo sa provincial government.
Ini matapos ginmando ni Governor Alfredo Marañon Jr. ang pag-imbentaryo sa mga JOs kasunod sang impormasyon nga may mga ghost employees ukon ginaswelduhan lang apang wala nagaduty.
Suno kay Provincial Accountant Merly Fortu, 659 ang kabug-usan nga numero sang mga JOs nga gin-hire sang tuig 2016 apang igadeterminar pa kun amo man ni gihapon nga mga empleyado ang nagahatag sang serbisyo sa karun.
Sa tanan nga mga opisina sa kapitolyo, ang Office of the Provincial Agriculturist ang may pinakamadamo nga numero sang JOs nga nagadangat sa 138; ginasundan sang Provincial Veterinary Office nga may 92; Teresita Lopez Jalandoni Provincial Hospital nga may 58; Hospital Operations Department nga may 38; kag Provincial Environment Management Office nga may 36 ka mga JOs.
Nahibaluan nga ang kontrata sang mga job order casuals ang halin Enero tubtub Mayo kag Hulyo tubtub Nobyembre.
