Nagasuporta si Senate Pro Tempore Panfilo “Ping” Lacson sa ginaduso nga joint oil and gas exploration sa tunga sang Pilipinas kag China, ilabi na sa West Philippine Sea, sa tunga sang pamahog sa pangkalibutanon nga suplay sang langis tuga sang tensyon sa Middle East.
Suno kay Lacson, nagakadapat nga tun-an sang administrasyon ni Presidente Ferdinand Marcos Jr ang nasambit nga tikang, bangud may potensyal ini nga makaganar sang daku kag makabulig sa energy security sang pungsod.
Apang ginpanindugan sini nga ang anuman nga kasugtanan dapat hugot nga magsunod sa 60-40 foreign ownership rule nga yara sa 1987 Constitution, kun sa diin indi magnubo sa 60% ang dapat ginapanag-iyahan sang mga Pilipino.
Dugang pa sini, apisar bugana sa langis ang natural gas ang West Philippine Sea, kulang sa technical kag financial capacity ang Pilipinas nga magpatigayon sang exploration.
Sa pihak nga bahin, ang China ang may yara sang teknolohiya nga kinahanglanon para diri.
Suno kay Lacson, kun magtugot ang China sa 60-40 division, mangin indikasyon ini sang pagkilala sang soberanya sang Pilipinas sa nasambit nga kadagatan.
