Ginpangunahan ni Supreme Court Chief Justice Lucas Bersamin ang paglunsyar sang Justice Zone project sa ciudad sang Bacolod, Agusto 30 sang aga.
Bangud sini, ang Bacolod City na ang ikalima nga ciudad sa pungsod nga may yara sang Justice Zone – isa ka programa nga suportado sang European Union agud nga mapadasig ang resolusyon sang mga kaso sa korte.
Ang una nga apat ka mga Justice Zones amo ang Quezon City sang tuig 2014, Cebu City sang tinalikdan nga tuig, Angeles City sang Abril subong nga tuig, kag ang Davao City sang tinalikdan nga bulan sang Hulyo.
Kaupod ni Bersamin sanday Justice Secretary Menardo Guevarra kag Department of the Interior and Local Government Secretary Eduardo Año nga mga miyembro sang Justice Sector Coordinating Council.
Ang Justice Zone ang isa ka permanente nga meeting, advisory kag decision-making structure nga nagalakip sang most senior justice officials sa isa ka lugar.
Ini ang ginalakipan sang mga trial court, prosecution service sang Department of Justice, Public Attorney’s Office, Bureau of Jail Management and Penology, provincial jails, barangay justice system kag ang Parole and Probation Administration.
Paagi sa suporta sang Justice Sector Reform Program Governance in Justice sa idalom sang financial grant sang European Union, handom sang programa nga mapasanyog ang full cooperation sa mga nagatrabaho sa criminal justice system para sa madasig nga hustisya.
Handom man sini nga mapahalog ang mga prisuhan.
