Nagahulat pa ang Kamara sang official nga pronouncement nagikan sa Malakanyang kun igacertify sang presidente nga urgent ang Bayanihan to Arise as One Act ukon Bayanihan 3 nga magapain sang P405.6 billion pesos nga pondo para sa recovery sa halit sang COVID pandemic.
Sa interview sang Bombo Radyo kay Bacolod City Lone District Congressman Greg Gasataya, vice chairperson sang House committee on appropriations, wala pa gid sa karon sang klaro nga pronouncement angot sa urgency sang bill apang may mga efforts ang Kamara nga mapasar ang hagna antes ang sine die adjournment sa Hunyo 4.
Sa tion nga certified urgent ang hagna suno kay Gasataya, may official document nga ginapadala ang Office of the President nga nagapahibalo sa legislative body.
Sa tion nga icertify sang presidente nga urgent ang Bayanihan 3 bill, makatipid sang tinion ang Kamara bangud sarang nga mapasar ang hagna sa second kag third and final reading sa pareho nga adlaw, kaangay sang Bayanihan 1.
Sa idalom sang amo nga hagna, magabaton ang kada Pilipino sang P2,000 kag ini ang igahatag sa duha ka tranches – P1,000 kada tranche.
Magluwas diri, nalakip man sa provisions sang hagna ang wage subsidy, assistance sa mga displaced workers, housing relief, assistance sa agri-fishery sector, medical assistance kag support sa basic education.
