Nagfile ang kampo ni Alice Guo, anay alkalde sang Bamban, Tarlac, sang apelasyon sa pamatbat sang lokal nga korte nga nagaconvict sa iya sa qualified human trafficking, isa ka non-bailable nga krimen nga may mabug-at nga salabton sa idalum sang layi sang Pilipinas.
Suno kay Nicole Jamilla, abogado ni Guo, ang apelar ang kabahin sang pagdepensa sa kinamatrong ni Guo bilang akusado.
Ginpamatbatan si Guo kag ang iya pito ka mga co-accused sang reclusion perpetua, multa nga P2 million kag dugang nga bayad sa halit sa mga biktima.
Samtang, ginalauman subong nga semana nga magapagwa sang resolution ang RTC Branch 167 sa motion sang kampo ni Guo para pahanugutan nga magpabilin ini sa Pasig City Jail Female Dormitory imbes nga sayluhon sa Correctional Institution for Women sa Mandaluyong.
Ginakabalak-an sang iya kampo ang seguridad kag safety ni Guo in kaso nga sayluhon ini sa national facility.
