BACOLOD CITY — Kapin 1,500 ka mga mangunguma sa Sur nga bahin sang Negros Occidental ang nagbaton sang certificate of land ownership award gikan sa Department of Agrarian Reform (DAR) kahapon nga adlaw.
Dululungan nga nagbaton sang tagsa nila ka mga CLOA ang 1,444 ka mga agrarian reform beneficiaries (ARBs) sa quarto, quinto kag sixto dristrito nga nahatagan sang kabug-usan nga 1,121 ektariyas nga duta.
Sa 4th district, may 626 ka mga benepisyaryo nga nagbaton sang kabug-usan nga 504 ektariya nga duta.
Sa 5th district, 503 ka ARBs ang nagbaton sang CLOA para sa 390 ektariya nga duta kag sa 6th district, may 315 ka mga benepisyaryo sang kabug-usan nga 226 ektariya nga duta.
Sa distribusyon sang CLOA sa 4th District nga ginhiwat sa ciudad sang Bago, gin-aku ni Provincial Agrarian Reform Program Officer (PARPO II) Lucrecia Taberna nga may gin-atubang sila nga mga kabudlayan antes nadayon ang pagpanagtag sang CLOA.
Ini amo ang pagpakatig-a sang mga tag-iya sang duta nga ipaidalom sa Comprehensive Agrarian Reform Program (CARP) ang ila nga propyedad.
Apang suno kay Taberna, paagi sa CARP, sarang makuha sang DAR ang duta sang mga may kadutaan nga masobra sa singko ektariya agud ipanagtag sa mga mangunguma.
May kaangtanan sini, ginapanugyanan sang DAR ang mga agrarian reform beneficiaries nga amligan ang duta nga ginapanagtag sang gobyerno.
Ginpahayag ni Taberna nga dapat tungdan sang mga bag-o nga land owners ang ila derecho kag subong man obligasyon sa duta nga ginhatag sa ila kun sa diin sila ang dapat nga magkultibar, magdumala kag magprodukto gikan diri.
Ginpasalig ni Taberna nga sa bahin sang DAR, nakahanda sila nga maghatag sang nanari-sari nga bulig kag suporta paagi sa ila nga support services kag agrarian justice delivery.
Nahibaluan nga madamo sa agrarian reform beneficiaries ang nagakapilitan nga ibaligya, iprenda ukon ipaaryenduhan ang duta nga ginahatag sa ila sang gobyerno bangud wala sila sang kapital agud magpananom.
