Malapit P7 million nga balor sang ginasuspetsuhan shabu ang na-intercept sang mga otoridad sa apat ka mga indibidwal sa Sibulan Port sa Negros Oriental kahapon sang hapon.
Nadakpan sa gintingob nga pwersa sang Philippine Drug Enforcement Agency (PDEA) Negros Oriental, local police kag Philippine Coast Guard (PCG) ang mga suspetsado nga sanday Tim Bernardo Las Piñas, 25-anyos, nga isa ka high value target (HVT) ; kag Lesa Taganile, 23 lunsay residente sang Bantayan, Dumaguete subong man sanday Ellery Jude Alabanzas, 23, sang Canlaon City kag Kathleen Caryl Tulabing, 23, sang Buloc-buloc, Sibulan.
Sa interview kay Lt. Commander Ludovico Librilla, commander sang PCG Negros Oriental, ginpahayag sini nag-coordinate sa ila ang iban nga operating team tuhoy sa mga suspetsado nga sakay sang RORO vessel gikan sa Santander, Cebu kag padulong sa Sibulan.
Pagdungka sang barko sa pantalan mga alas-2:00 sang hapon, gilayon nga gin-usisa ang apat nga may dala nga isa ka pribado nga salakyan kag diri na narekober ang kapin isa ka kilo nga shabu nga ginabanta nagabalor sang P6.8 million.
Ginkumpirmar ni Librilla nga yara na karun sa kustodiya sang PDEA Negros Oriental ang mga suspetsado.
