Nagdangat sa kapin 5000 ka puno sang ginapahayag nga Marijuana ang ginsunog sang mga kapulisan sa boundary sang Brgy San Jose kag Brgy Manduao, Bayawan City, Negros Oriental sang Miyerkules sang hapon, Setyembre 25, 2024 kag ini nagabalor sang kapin P1 Million.
Ang operasyon ang ginpatigayon sang mga kapulisan sang Bayawan City Police Station kag iban nga mga units sang Philippine National Police sa Negros Oriental.
Gindala naman sang mga kapulisan ang lima ka stalks sang ginapahayag nga Marijuana para sa examination.
Sa interview ang Police Lt. Stephen Polinar, Public Information Officer sang Negros Oriental Police Provincial Office, bangud wala sang CCTV sa lugar, padayon ang mga ini sa pagback track agud nga mahibaluan kun may yara sang nagapadulong sa lugar agud nga magtanom sini.
Suno kay Polinar ang lugar nga nahamtangan sang gintamnan sang Marijuana ang malayo sa mga pamalay.
Suno diri, ginsunog na nila sa lugar matapos magabot ang Marijuana bangud mabudlay kag delikado na kun idal-on pa sang mga kapulisan pabalik.
Ginpahayag man sini nga padayon ang ila nga kampanya batok sa illegal nga druga.
Nagpanawagan man ini sa mga pumuluyo nga magkooperar kag ireport sa mga kapulisan kun may yara sang presensya sang illegal nga druga sa ila tagsa ka mga lugar.
