4,724 nga mga Certificate of Land Ownership Awards (CLOA) ang napanagtag sa mga Agrarian Reform Beneficiaries (ARBs) sa Negros Occidental sa Bago City Coliseum, nga ginpanagtag mismo ni President Ferdinand “Bongbong” Marcos Jr.
Matapos ang ceremonial energization sang Cebu-Negros-Panay 230 kilovolts backbone project sang National Grid Corporation of the Philippines (NGCP) sa Bacolod City, si Presidente Marcos ang nagbyahe padulong sa ciudad sang Bago agud ipanagtag ang mga land titles.
Kaupod ni Presidente Marcos sa pagpanagtag si Agrarian Reform Secretary Conrado Estrella III.
Ang duta nga nacover sang CLOA ang nagdangat sa 2,550.39 hectares sang duta nga napanagtag sa 2,797 ARBs.
Ang programa ang gintambungan man ni Negros Occidental Governor Eugenio Jose “Bong” Lacson, Vice Governor Jeffrey Ferrer kag mga Alkalde kag Kongresista sa Negros Occidental.
Magluwas sa paghatag sang titulo sang duta, ang Presidente ang naghatag man sang balor P69 million nga farm equipments kag support services sa mga ARBs.
Ini bangod madamo sang mga Comprehensive Agrarian Reform Program (CARP) beneficiaries ang wala nakapanguma sa ila nabatun nga duta bangod sa kakulangan pinansyal.
Ini ang nagaresulta naman sa pagprenda ukon pagpa-arendo sang mga duta sa iban.
Bangod sini ang Presidente ang naghatag sang support services kalakip na ang abono kasubong man mga farm equipments nga magamit sang mga mangunguma.
Wala naman sang bayaran pa sa bangko ang mga nasambitan nga ARBs bangod ang ila mga balanse ang ginbayaran na sang gobyerno.
Ginpasalig naman ni Estrella nga tinguhaan sang DAR nga makapagwa sang 100,000 nga mga land titles sa bilog nga pungsod subong nga tuig.
Isa naman sa marching order ni Presidente Marcos ang mapadasig ang proseso sa paghatag sang mga benepisyo.
