Gin-athag sang pinuno sa Bacolod City Mobile Force Company nga basic rules sa ila nga mga kapulisan ang makahibalo sang gun safety handling.
Ini kasunod sang pagluthang sang pito ka tuig nga bata sa iya pulis nga amay sa ciudad sang Sagay sang Sabado.
Ang biktima ang ginkilala nga si Police Staff Sergeant Lernie Alacha, 44 anyos.
Madumduman nga samtang naga-away si Alacha kag ka-live in sini nga si Iren Dayanan, una nga ginkuha sang bata ang caliber 9mm M16 rifle agud tiruhon ang iya amay apang ini ang wala naglupok bangod nakasafety.
Nakuha sa bata ang armas luthang, apang samtang nagapadayun ang away sang iya mga ginikanan, ginkuha naman sini ang Glock 17 pistol nga amo ang gingamit sa pagluthang sa iya amay.
Sa interview sang Bombo Radyo Bacolod kay Police Lt. Col. Ronnie Brillo, basic rules na sa Philippine National Police nga kun yara sa balay, dapat nga I-unload ukon kuhaan sang bala ang mga armas-luthang kag ibutang sa safety mode.
Ini ang dapat nakatago man sa isa ka box ukon cabinet nga indi ma-access sang mga kabataan.
Pahanumdom sini nga mandato sa kapulisan nga indi magload sang bala sa armas-luthang kun indi handa nga magtiro kag bisan wala sang bala, dapat kaandan na nga ini ang itutok sa safe direction kun wala man sang plano nga tiruhon.
Aminado si Brillo nga madamo na sang mga kaso sang accidental firing bangod sa paghampang sang mga kabataan sang service firearms sang ila mga ginikanan.
Paathag man sini nga 100 porsyento sa mga kapulisan ang may issued nga short firearms samtang gamay na lamang ang nabilin nga Police personnel nga wala pa sang issued long firearms.
Bangod sa natabo sa pulis nga miyembro sa Sagay City Police Station, liwat man nga ginpahanumduman sang City Director sa BCPO ang mga kapulisan sa husto nga pagsecure kag paggamit sang mga armas-luthang.
