BACOLOD CITY — Nagalab-ot sa halos 700 mil pesos ang balor sang karne nga nakumpiskar sang Task Force Butagoy sa mga operasyon sini batok sa ilegal nga pagpang-ihaw sang kasapatan sa ciudad sang Bacolod humalin Enero tubtob Hunyo 2017.
Ginkumpirmar ni Task Force Butagoy Head Rex Juplo, nagalab-ot na sa 2,878.20 ka kilo ukon 630 mil 913 pesos kag 20 sentimos ang balor sang karne nga ila nakumpiskar humalin Enero 1 tubtob Hunyo 30, sini nga tuig.
Ini ang resulta sang 15 ka mga operasyon nga ila ginpatigayon sa una nga anom ka bulan sang tuig.
Ang pinakaulihi nga operasyon ginpatigayon sini nga bulan sang Hulyo kun sa diin 12 ka kilo sang karne ang nakumpiskar.
Samtang, nagpaandam ang City Health Office sa mga konsumidores nga siguruhon nga preska kag indi lub-ok ang karne nga mabakal agud malikawan ang food and water-borne disease.
Suno kay Dr. Grace Tan, ang head sang environment and sanitation division sang Bacolod CHO, kinahanglan siguruhon sang mga konsumidores nga husto ang pag-preserbar sang karne kun sa diin indi lapsion ang manok kag wala naga-green ang unod sini.
Nahibaluan nga madamo sa mga nagabaligya sa merkado ang ginatungtong lamang ang karne sa mga lamesa kag tapangko.
Ginalubong kag ginabubuan sang muriatic acid ang karne nga makumpiskar gikan sa mga nag-ihaw sang sapat saguwa sang Bacolod slaughterhouse sa Barangay Handumanan.
Suno kay Executive Assistant Ernie Pineda, ang cluster head sang Market and Slaughterhouse, matapos makumpiskar, ginalubong kag ginabubuan sang kemikal ang makumpiskar nga karnet agud masiguro nga indi na ini pagkutkuton kag ibaligya ukon kaunon sang sin-o man.
Suno kay Pineda, ginadakop sang Task Force Butagoy ang mga nagapangihaw saguwa sa slaughterhouse bangud indi masiguro nga luwas nga konsumuhon ang mga ini.
Sa pihak nga bahin, ginpaalinton ni Pineda nga kun mapasar na ang ordinansa nga naga-dumili sa pag-lechon sang kasapatan saguwa sang Bacolod Slaughterhouse, dapat nga magpaidalom sa inspection ang sapat antes kaga pagkatapos ini lechonon.
Suno kay Pineda, ini agud masiguro nga luwas man nga konsumuhon ang ginabakal nga lechon sa ciudad sang Bacolod.
Sa karon, may mga serye sang pagsinapol nga ginapatigayon ang Task Force Butagoy upod sa mga stakeholders kag plano nga magpatigayon sang public hearing agud mahitso ang mga issues gikan sa mga manug-lechon kag sa publiko.
