May napasaka na nga kaso sa Office of the City Prosecutor tuhoy sa mga Grade 8 students nga gina-alegar ginmolestiya sang ila subject teacher sa Bacolod City.
Sa interview sang Bombo Radyo Bacolod kay Police Lt. Rowena Jean Magan, officer in charge sang Women and Children Protection Desk (WCPD) sang Bacolod City Police Office, isa pa lamang gikan sa tatlo ka mga complainant ang nakapasaka sang kaso.
Ini bangod isa palang ang nauna nga matapos sa ginpatigayon nga psychological evaluation, kag ang duha ang ginaschedule pa lamang.
Madumduman nga desidido ang tatlo ka Grade 8 students nga pasakaan sang kaso ang ila subject teacher sa TLE nga suno sa ila nagahimas sa ila abaga kag hungod nga ginasagaid ang iya kinatawo sa ila nga likod.
Ang insidente ang gina-alegar natabo sang Setyembre.
Ang manunudlo ang may asawa man nga manunudlo sa iban nga eskwelahan, samtang lunsay professionals naman ang ila mga kabataan.
Suno kay Magan, ginfile na nila ang kaso nga paglapas sa Republic Act 7610 ukon Child Abuse Law, bangod sa sexual harrassment sa mga minor de edad.
Kun magwa na ang result sa psychological evaluation sa duha ka biktima, sila ang magapasaka man sang dugang nga kaso.
Paathag ni Magan, nga ang resulta sang psychological evaluation ang makapabug-at sa kaso, bangod mapamatud-an sang eksperto ang ginapahayag trauma sang mga dalagita.
