Ginapreparar na ang pagpasaka sang kaso sa tatlo ka mga suspetsado nga nagkastigo kag nagbuno sa call center agent sa Magsaysay Avenue, Brgy Singcang-Airport, Bacolod City.
Ang biktima ang ginkilala nga si Bret Requieron, 29 anyos, residente sang Purok Sigay, sa nasambitan nga Barangay samtang ang nagbuno pa lamang ang ginhingadlan gikan sa tatlo ka suspetsado nga amo si Ajay Austria, residente sang Deca Homes Subdivision, Brgy Cabug, Bacolod City.
Madumduman nga pag-abot sang biktima kapin alas-2:00 sang kaagahon sa parking area, siya ang ginbantayan sang tatlo kag ginkastigo.
Gin-alegar nga ginbuno naman ni Austria ang biktima sang gina-alegar 15 ka beses kag ginpahayag gingisi ang bibig padulong sa dulunggan gamit ang kutsilyo, ginhimuan sang ekis sa guya kag ginkuritan man ang agtang.
Sa karun padayun pa nga ginabulong sa ospital ang biktima.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, ginahulat na lang nga makagwa sa ospital si Requieron agud mahitso na ang pagpasaka sang kaso sa tatlo ka suspetsado.
Suno diri, mahimo pasakaan sang kaso nga frustrated homicide ang mga suspect.
