Ginapreparar na ang pagpasaka sang kaso nga frustrated murder sa lalaki nga nagpamuno sang pulis sa banwa sang Murcia.
Ang suspect ang ginkilala nga si Alyas Oian, 29 anyos, residente sang Purok Super L, Barangay Pandanon, Salvador Benedicto, samtang ang biktima ang 36 anyos nga Police Staff Sergeant, nga residente sa Brgy Pandanon, Murcia.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, nadakpan ang suspect paagi sa manhunt operation sa koordinasyon sa mga Police Stations gikan sa kaiping nga mga banwa kag ciudad kaangay sa Bacolod City, Bago City kag Salvador Benedicto.
Suno kay Labaro, wala nila nakita ang suspect sa lugar kun sa diin natabo ang krimen, samtang ang Don Salvador Benedicto Municipal Police Station ang nagdeploy man sang kapulisan sa palibot sang balay sang suspect.
Natigayon nga madakpan ang suspect malapit lamang sa iya nga balay, kag sa karun nakahunong na sa Murcia Municipal Police Station.
Ini ang natumod nga may kaso naman sadto nga murder.
Nahibaluan nga nagakatulog ang pulis sa balay sang iya abyan sang mabatian sini nga may ara sang komosyon sa gwa.
Gilayon nga naggwa ang pulis agud kuntani magtambag, apang siya ang hinali nga ginbuno-buno sang suspect.
Sa karun, yara na sa estable nga kondisyon ang pulis, apang padayon pa nga nagapaayo sa ospital.
