Nagakaalarma ang probinsya sa pagsaka sang kaso sang rabies sa Negros Occidental subong nga tuig kun ikumparar sang 2021.
Suno kay Rafael Marmolejo, Provincial Rabies Coordinator sang Provincial Health Office, sang tuig 2021, kapin 21 mil ang kabug-usan nga kaso sang animal bite sa probinsya samtang sini nga tuig, nagdangat na sa 14 mil ang kaso sang kagat sang mga sapat sa ikaduha pa lamang nga quarter.
80 tubtob 85 porsyento sang animal bite cases ang kagat sang ido.
Sang tuig 2021, may yara lamang sang apat ka mga kaso sang rabies samtang as of October 3, 2022, may yara na sa 20 ka mga kaso sa probinsya.
Suno kay Marmolejo, ang figures amu lamang ang mga kaso nga nakumpirmar nga positibo sa rabies santo sa resulta sang laboratory.
Nagpanugyan naman ini sa mga pumuluyo nga kun makagat sang ido, gilayon nga hugasan ang pilas sa sulod sang napulo tubtob 15 ka minutos gamit ang running water kag habon kag butangan sang betadine.
Suno sa iya, indi man dapat pagpisgaon ang pilas kag indi pagbutangan sang ahos.
