Arestado ang isa ka lalaki nga ginapahayag kawatan sa sulod sang isa ka balay sa Claridad Street, Barangay Villamonte, ciudad sang Bacolod, Sabado sang aga, Hulyo 13.
Ginkilala ang nadakpan nga si Karllon Ticala, 38-anyos, soltero, wala sang trabaho, kag residente sang Maquiling St. sa nasambit nga barangay.
Sa interview sang Bombo Radyo Bacolod kay Police Captain Francis Depasucat, station commander sang Bacolod City Police Station 4, nagpanawag sa ila ang complainant agud nga magpahibalo nga ginsulod ang ila balay.
Suno kay Depasucat, gilayon man sila nga nagresponde kag nadakpan gid nila sa akto ang suspek.
Suno sa station commander, sirado man ang balay apang nagpangita ang suspek sang pamaagi agud nga makasulod sa balay.
Nakaagi man ini priso sang nakaligad nga tuig apang sang narecover ang ginkawat sini wala nagpasaka sang kaso ang anay nabiktima.
Ginpahayag sang state commander nga ginahulat na lang nila nga may magkadto agud nga magpasaka sang reklamo batok sa suspek.
Nagpanugyan man ini sa mga pumuluyo nga daan mangin vigilante kag ireport dayun sa mga kapulisan kun may yara sang makaduluda sa palibot agud nga marespondehan.
