Nagpanawagan ang Bacolod Police Station 1 nga mas maayo nga pasakaan sang kaso ang sin-o man nga nagalapas sang layi agud nga mapahagan-hagan ang pagluntad sang krimen.
Sa interview sang Bombo Radyo kay Police Major Elmer Bonilla, station commander sang Bacolod Police Station 1, wala sang may nagpalapit sa ila para magreklamo angot sa natabo nga pagpangawat sa isa ka pharmacy sa tabok sang Corazon Locsin Montelibano Memorial Regional Hospital.
Sang Domingo, isa ka lalaki ang nakita sa CCTV camera nga nagsulod sa Tabletas Pharmacy kag nagabantay sa giho sang cashier.
Ginkuha sini ang iya kalo sa bulsa kag ginsuksok kag samtang nagatalikod ang cashier, ginkuot sini ang cellphone sang cashier nga nabutang sa estante kag dali-dali nga naggwa.
Suno kay Bonilla, kun basehan ang ila crime investigsation report sa bulan sang Hunyo, may yara sang pagsaka sa numero sang krimen nga natabo, ilabi na ang may kaangtanan sa illegal nga druga, pagpangawat kag pagpanghold-up.
Apang, suno diri wala sang may nagapa-blotter sa ila kag kun may yara man, wala man ini ginapasakaan sang kaso.
Pahayag ni Bonilla, ini nagapasalig sa mga may sala nga bisan sila ang naglapas sa layi, wala man sila nadakpan.
Panugyan sini nga kun may yara sang na-identify nga violator mas maayo nga ipa-blotter kag pasakaan ini sang kaso, agud nga mapanubo ang porsyento sang pagluntad sang krimen sa ciudad.
