Arestado ang lalaki nga nagapangawat sang water meter sa ginpatigayon nga drug buybust operation sa No. 8 Dalia Street, Purok Matahom, Brgy. Mansilingan, Bacolod City, Negros Occidental, sang Biyernes, alas- 2:23 sang hapon.
Ang suspetsado ang ginkilala nga si alyas Kevin, 31 anyos, single, wala sang trabaho, kag residente sang Brgy. Mansilingan, Bacolod City.
Sa interview sang Bombo Radyo kay Police Capt. Dax Santillan, station commander sang Bacolod Police Station 7, madugay na nga ginamonitor ang suspek nga natigayon nga nadakpan.
Nakuha sa paghinakop ni Kevin ang kapin sa anum ka gramo sang suspected shabu nga may standard drug price nga P40,800.
Suno kay Santillan, sa background checking sa suspek natukiban nga si Kevin ang ginakabig nga notorious nga kawatan sang kuntador sang tubig.
Siya ang nakit-an sadto sa isa ka CCTV footage nga nagapangawat sang kuntador sa Brgy Alijis.
Suno sa station commander gintuad man sa ila ni Kevin kun diin sini ginabaligya ang water meter.
Ang kwarta gikan sa iya ginbaligya ang ginagamit naman sini bakal sang illegal nga druga.// Natukiban man nga si Kevin ang anay nagatrabaho bilang plumber
Sa karun napasakaan na sang kaso ang suspetsado.
