May gin-assign na nga barangay tanod nga magabantay sa lugar nga ginahaboyan sang basura sa barangay Mansilingan, Bacolod City.
Sa interview sang Bombo Radyo kay barangay kagawad Boy Pico, may ginbutang nga duha ka barangay tanod para magbantay sa area alas- 6:00 sang gab-i tubtob alas- 2:00 sang kaagahon.
Suno diri, shifting ang ila pagbantay kada duha ka oras.
Suno kay Pico, may yara sang report halin sa mga barangay tanod nga may yara sang mga salakyan kag tricycle nga may dala nga sinako nga basura kag ginabilin sa area.
Ginasaway ang mga nagahaboy sang basura kag ang madakpan may multa nga P500 sa first offense, P1,000 sa second offense kag ang mga violators may penalidad nga community service.
Pahayag ni Pico, ginapakuha man sa mga barangay tanod ang pangalan kag address sang mga nagahaboy sang basura sa kilid sang dalan bangod kalabanan nagahambal nga residente sila sang barangay Mansilingan apang nagapati ini nga iban indi na pumuluyo sang barangay.
Nagapangabay si Pico nga likawan ang illegal dumping sa karun nga maayo na naman ang pagpanghakot sang basura sa ciudad.
