“Bonifacio: Nagkakaisa sa pagbabago” ang tema sang pagsaulog sang Bonifacio Day subong nga tuig.
Ang programa nga nga nag-umpisa alas-7:30 kaina sang aga ang ginpatigayon sa Bonifacio Park sa atubang sang Andres Bonifacio Elementary School 1, kun sa diin nahamtang ang rebulto ni Gat Andres Bonifacio.
Ang aktibidad ang gin-organisar sang mga manunudlo kag estudyante kag ini ang gintambungan man sang opisyal sa Department of Education division of Bacolod City, ni Public Order and Safety Office (POSO) Head retire General Primitivo Tabujara, Bacolod City Police Office director Police Col. Joeresty Coronica, apang wala sang bisan isa nga konsehal.
Sa speech ni Arnel Ariola, principal 3 sang ABES 1, kinahanglan ang paghugpong agud malab-ot ang pagbag-o nga madugay na nga handom sang kadam-an.
Paathag sini nga dako ang papel sang nagkalainlain nga ahensya sang gobyerno partikular na ang Deped sa paghatag sang husto nga ihibalo sa mga kabataan.
Magluwas sa mga tulun-an, panawagan ni Ariola sa mga manunudlo nga matudlo sa mga kabataan ang maayo nga ugali ukon pamatasan kag magsabuhi kaangay kay Gat Andres Bonifacio.
Panindugan sang principal nga malab-ot lamang ang pagbag-o kun nagahugpong, kag ini ang dapat maumpisahan sa kaugalingon, pamilya, komunidad, gobyerno kag labaw sa tanan hingyuon ang pag-ubay sang Ginoo.
