Ginklaro ni Councilor Jude Thadeus Sayson nga ang pagbakal nila sang kapin 75 hectares nga duta sa Hda Conchita, Brgy Granada ang preparasyon para magamit sa palaabuton.
Ginkalipay sang konsehal nga ginbasura sang Ombudsman ang civil kag criminal case nga ginfile ni radio blocktimer Roger Ledesma sa alegasyon nga overpriced kag may irrigularidad sa procurement sang duta.
Nagapati si Sayson nga pamulitika lamang ang kaso ilabi na nga ini ang ginfile kadungan sa election period sang 2022.
Nagapati man ini nga gingamit lamang si Roger Ledesma bangod wala man ini nakabatikos sa nasambit nga issue apang hinali na lamang nagfile sang kaso.
Dugang pa niya nga mahimo gingamit si Ledesma, bangod kaapelyido sini ang ginbaklan sang duta nga pamilya Ledesma.
Ginalantaw nita nga ini agud mapagwa nga away pamilya ang sa likod sang kaso.
Suno kay Sayson, sila sa Committee on Laws ang nagproseso sang tanan nga legal documents kag nagpili kag nagpreparar sang pagbakal sang duta.
Paathag sang konsehal nga kapin 30 ang nagfile sang intent to sell, kag tanan ang ginlibot sang city engineers kag appraisal committee.
Ang duta sang pamilya Ledesma ang nabakal nila sa balor nga P1,300 per square meter, nga para sa iya amo na ang pinakabarato.
Suno diri, sa karun ang kaangay nga kalidad sang duta sa lugar ang mabakal na sa P3,000 per square meter.
Suno diri ang 75 hectares nga duta ang indi gamiton para sa relocation, bangod may nakapartinisir na nga duta para sa amo nga purpose sa baylo ini ang itigana para sa palaabuton.
Paathag ni Sayson nga ini ang kabahin sa landbanking agud may pondo na nga duta ang ciudad, antes paman magmahal ang presyo.
Suno sa iya, indi na makabakal ang masunod nga henerasyon sang duta nga balor P1,300 per square meter, kag mahimo indi na masarangan ang pagbakal sang 75 hectares nga kalaparon sang duta.
