Napilasan ang 21-anyos nga driver sang kotse matapos makabunggo sa truck sa Circumferential Road, Barangay Taculing, ciudad sang Bacolod kaina sang aga.
Ginausoy sang truck ang south to north direction bangud nagikan ini sa Barangay Haguimit, La Carlota City kag padulong kuntani sa Silay City agud nga magdul-ong sang tatlo ka tonelada nga lata.
Suno sa driver sang truck nga si Arnel Butt, 40-anyos, hinali lang ginkaon sang kotse nga padulong sa south direction ang iya nga lane.
Nagpundo pa kuntani si Butt apang dire-diretso ang dalagan sang Toyota Wigo tubtub nga nagbunggo sa truck.
Maswerte naman nga may air bag ang Wigo gani diutay lang ang pilas sang driver nga si Denny Chris Mahipus sang Barangay Alijis, Bacolod City.
Gindala si Mahipus sa Bacolod Adventist Medical Center samtang wala naman napilasan si Butt kag ang pahinante.
