Ginpahayag ni Bacolod City Councilor Em Ang nga indi luyag sang Sangguniang Panlungsod nga magdelay sang mga programa sang ciudad apang indi man nila gusto nga magsala ilabi na nga ang alkalde ang maperma gani luyag nila masiguro nga ginacomply ang mga requirements sang mga ginapropose sa city council.
Ini matapos gindefer sang SP ang memorandum of agreement tuhoy sa Bacolod City Comprehensive Health Care Program (BACCHIP) bangud may mga klaripikasyon pa nga ginapangayo ang city council tuhoy sa programa kasubong man ang MOA sang city government kag Kalipay Negrense Foundation Inc. tuhoy sa P4 million nga financial assistance nga igahatag sang ciudad para sa Community Konsulta Program bangud sa kakulang sang dokumento kag impormasyon.
Sa interview sang Bombo Radyo kay Ang, ginpahayag sini nga una gid nga nakakuha sang iya atensyon amu ang pagpresentar sang MOA sang Kalipay Negrense Foundation Inc. nga madamo sang blanko.
Suno sa iya, kun ano ang naaprubahan nga dokumento sa SP, amu gid ina ang mangin official nga document apang sa ginpasa nila sa city council, wala pa nakaperma ang pihak nga partido kag ang magwa, mauna pa permi si Mayor Alfredo Benitez.
Sa kaundan sang MOA, may mga pamangkot man nga ginklaro kag luyag pa nila nga masabat.
Suno diri, ginpadefer man ni Councilor Kalaw Puentevella, chairman sang Commitee on Health sa SP ang nasambit nga MOA bangud kulang gid ang detalye.
Samtang, ginpahayag sang konsehal nga maayo gid nga programa ang BACCHIP apang may mga kulang man sa MOA nga ginpasa sa ila.
Suno diri, wala nabutang kun sin-o ang mga authorized signatories kag wala perma nga ginpresentar.
Suno sa iya, ginpamangkot ang tuhoy sa P15,000 nga guarantee kuntani para sa mga pasyente kag kun diin magahalin ang budget para diri.
Suno kay City Legal Officer Atty. Romeo Carlos Ting kag City Administrator Atty. Pacifico Maghari, ang P15,000 ang magagikan sa Philippine Health Insurance Corporation (PhilHealth) kag iban pa nga national healthcare grants.
Suno sa CLO, wala sang balayran ang ciudad apang kun kulang ang maprovide sang PhilHealth, ang city government ang matabon diri.
Namangkot man si Ang kun diin mahalin ang kwarta apang indi klaro ang sabat nga nakuha sini nagikan sa mga resource persons.
Ginpadangat man sini nga daw kaangay nga duplication lamang ang BACCHIP card kun pwede man lang makagamit sang PhilHealth card kag wala man sang may mahatag nga eksplenasyon sanday Ting kag Maghari.
Bangud diri, nagdesisyon man ang floor leader nga si Councilor Al Victor Espino nag idefer ang memorandum of agreement.
