Gin-ako sang New People’s Army (NPA) ang pagpatay sa isa ka kumprador sang sapat sa Sitio Makilo, Brgy. Camansi, Kabankalan City sang Domingo, Disyembre 14, 2025.
Ginkilala ang biktima kay Alberto Jimenez, 54 anyos, lalaki, balo , livestock buyer, kag residente sang Sitio Makilo, Brgy. Camansi, Kabankalan City, Negros Occidental.
Sa interview sang Bombo Radyo Bacolod kay Police Lt Col. Roberto Indiape, Chief of Police sang Kabankalan City Police Station, ang biktima ang nagakay-o sang motorsiklo sang ginpalapitan sang duha ka wala makilal-an nga mga persona kag gintiro ini nga nakaangkon sang samad sa ulo kag natuo nga bahin sang likod sini nga gintunaan sang kamatayon sini.
Matapos ang insidente ang mga suspetsado ang gilayon man nga naglakat kag nagpalagyo sa wala mahibaluan nga direction.
Narecover ang duha ka fired cartridges sang .45 caliber pistol.
Suno kay Indiape kaina nakabaton sila sang press release halin sa New People’s Army nga nag-ako nga sila ang responsable sa pagpatay sa biktima.
Suno sa hepe ini ang ginavalidate nila kag nagapangita sang paagi nga makilal-an ang duha nga naghimo sang krimen kag mapasakaan sang kaso kun ang pamilya ang willing nga magfile sang complaint.
Apisar nga gin-ako sang makawala nga grupo nga sila ang may kahimuan sang krimen ang mga kapulisan ang nagapadayon sagihapon sa ila nga imbestigasyon.
Ginpahayag man sang hepe nga ang biktima ang nagapakilala man sa iban nga siya ang asset sang army ukon sang police gani ini ang ginalantaw nga rason nga nag-trigger man sa mga suspetsado nga himuon ang krimen kag ini man ang rason sang NPA sa ginpagwa nga press release sa pagpatay kay Jimenez.
May report man nga nabaton ang mga kapulisan nga sadto ginpaandaman na ang biktima nga maghalong bangud may yara sang mga akig sa iya.
Ini bangud ginapahayag nga siya ang asset sang mga otoridad sa nagluntad nga encounter sang 2022 nga nagresulta sa kamatayon sang utod ni Jimenez.
Dugang pa ni Indiape ang biktima ang nagatrabaho bilang isa ka mekaniko kag nagapamakal man sang livestocks.
