Gin-athag sang La Carlota City Police Station nga wala sang abduction nga natabo, ini matapos nga nagpost sa social media ang utod sang isa sa gina-alegar nga gin-abduct sa ciudad sang Hulyo 9, 2024
Sa interview sang Bombo Radyo Bacolod kay Police Lt. Col. Lymel John Pasquin, Chief of Police sang La Carlota City Police Station, wala gin-abduct ang duha ka mga menor de edad nga babayi.
Suno kay Pasquin, ang duha ang nagpadulong sa ciudad sang Bacolod agud maglagaw sa isa ka mall.
Suno sa hepe, wala man sang kamatuoran nga ginpilit sakay sa puti nga van ang duwa ka kabataan.
Ini bangud gintsekyar nila ang mga CCTV footages sa lugar kag nakita nga wala sang puti nga van nga naglabay sadto nga tion nga naglakat ang mga ini.
Suno sa hepe, gin-athag sang amay sang isa sa bata nga wala sang alleged abduction nga natabo kag ini ang ginrason lamang sang iya nga bata agud nga indi pag-akigan.
Nagpangayo man ini sang pasaylo sa alarma nga natuga sang iya nga bata kag sa ginpost sa iya nga bata sa facebook bangud wala ini sang kamatuoran.
Ginpahayag man ni Pasquin nga nagtuga man ini sang panic sa mga tawo sa ciudad sang La Carlota apang nahangpan man sini nga nagakabalaka lamang ang mga ginikanan ilabi na nga manug abre-klase na.
Sa karun nakapauli na sa panimalay nila ang duha ka menor de edad.
Nagpanugyan man ini nga likawan ang pagpost sa social media sang unverified reports.
