Ginkalipay sang labor sector ang pag-aprubar sang House of Representatives sa third and final reading sang hagna nga nagaduso sang P200 nga dugang sa sweldo sang mga minimum wage earners.
Kahapon, naaprubahan sa third kag final reading sa House of Representatives ang paghatag sang P200 nga increase sa daily minimum wage para sa mga empleyado sa pribado nga sektor sa bug-os nga pungsod.
Sa ginpatigayon nga plenary session, gin-aprubahan ini sa boto nga 171 yes, wala sang no, kag may isa nga abstention.
Madumduman sang nagligad nga tuig, nagpasar man sang hagna ang Senado nga magahatag sang P100 nga increase sa daily minimum wage.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA) welcome development ang pag-aprubar sang House of Representatives sa third and final reading sang hagna nga nagaduso sang P200 nga dugang sa sweldo sang mga minimum wage earners.
Suno kay Sancho nagakadapat nagid man sa karun nga pasakaan ang sweldo sang mga mamumugon ilabi na nga ang purchasing power sang peso ang tuman na kanubo.
Ginpahayag man sini nga ang mga employers ang dapat nga magsunod bangud may yara man sang assistance nga ihatag ang gobyerno kadungan sang pagpatuman sang wage increase.
Dugang pa sini ang mga indi magpatuman nga employer ang may yara sang penalidad nga pangatubangon.
Ang nasambit nga dugang sa sweldo ang dako naman nga bulig sa mga empleyado sa pribado nga sector.
