Ginpanawagan sang Sentro ng mga Nagkakaisa at Progresibong Manggagawa (SENTRO) kay President Ferdinand “Bongbong” Marcos Jr. nga icertify as urgent ang P150 nga “legislated wage increase”.
Sa interview sang Bombo Radyo Bacolod kay SENTRO Secretary-General Joshua Mata, dismayado ang mga ini sa labor day message ni President Ferdinand “Bongbong” Marcos Jr. nga nagapanawagan sa pagreview sa minimum wage sa tagsa ka Regional Wage Board.
Suno diri kaangay nga wala ginahatagan sang abiso sang Secretary of Labor bangod ini ang wala sang ihibalo sa matuod nga sitwasyon.
Panindugan ni Mata nga ang ginapanawagan sang mga mamumugon amo ang legislated wage increase kag indi ang pagreview sang Regional Wage Board sa minimum wage, sa panindugan nga ang mga ini ang wala nagatrabaho sang husto.
Pahayag sini nga ila ang nagdangop sa Kongreso bangod magluwas nga tuman ka lawig sang proseso sa Regional Wage Board, apang paggwa sang desisyon, senilyo lamang ang ginahatag nga saka sa sweldo nga tuman kanubo sangsa poverty threshold.
Panawagan sang mga ini nga mas maayo nga icertify as urgent na lamang sang Presidente ang pagpasar sa legislated wage increase partikular na sa natalana nga labor meeting sa Mayo 5, agud makapiyan-piyan sa pag-antos sang mga mamumugon nationwide.
Panindugan sini nga sa pagdugang sang P150 sa minimum wage, nga makadugang sa disposable income kun sa diin makapulos man ang informal economy.
Nagapati ini nga may formula ang Department of Employment (DOLE) sa adjustment sang sweldo sang iban pa nga mga empleyado agud masabat ang distortion inkaso pasakaan ang minimum wage level.
Ginakasubo sang mga ini nga sa mga lugar nga mahina ang labor union, sa masami ang mga management amo ang nagadaog batok sa wage hike petition.
Paathag ni Mata nga sa Regional Wage Board tatlo ang representative sang gobyerno kag tagduha ang sa management kag labor.
Gani sa tion sang botohay, kun mahina ang labor union, sa masami ang management ang nagadaog.
Nagapati ini nga ang tikang ang magatul-id sang malawig na nga inhustisya ilabi na nga dekada naman sang ulihi nga nakapatuman sang legislated wage increase.
Dugang pa ni Mata nga palarehas lamang ang mga bili sang balaklon sa probinsya kag Metro Manila, kag may mga lugar pa nga mas mataas ang cost of living apang tuman ka layo sang lebel sang sweldo.
