Nagpatigayon sang separado nga mga transport strike ang United Negros Drivers and Operators Center (UNDOC-Piston) sa Talisay City.
Sa interview sang Bombo Radyo Bacolod kay UNDOC-Piston President Rodolfo Gardose, sila ang nagsunod sa panawagan sang National PISTON nga pagpatigayon sang transport strike sa kada local government units.
Gani luwas sa ila nga grupo sa Bacolod City nga nagpatigayon sang transport strike sa Bangga Patyo, Burgos Extension, Bacolod City upod sa grupo sang mga tricycle drivers, sila ang nagpatigayon man sang transport strike sa Brgy Tayabas, Talisay City.
Ang ila nga transport strike ang ginsuguran alas-6:00 kaina sang aga tubtob alas-6:00 subong nga hapon.
Ang Kabacod Negros Transport Coalition (KNETCO) ang nagpatigayon naman sang protest-rally sa Magsaysay Street, Bacolod City samtang ang Bacolod Alliance of Commuters, Operators, and Drivers (BACOD-Manibela) ang nagtipon naman sa Bacolod City Public Plaza.
Apang ang BACOD-Manibela ang nagpatigayon lamang sang ila nga transport strike sumugod alas-2:00 sang hapon.
Apisar nga lainlain ang venue, ang mga transport groups ang palarehas nga nagapanawagan sang tikang gikan sa gobyerno batok sa tuman nga pagsaka sang presyo sang produktong petrolyo.
